البيت الحمراء
لاَنَنْسَى عَادَاتْنَا يَا ذَالْحُضْرا
……….وْنَحْكي على التَاريخْ نُضْرُبْ تجْوَالة قَلْبي فَرْفَرْ شَاقْ للْبَيتْ الْحَمْرا
……….بالْمُقْرَة حَنَّاتْ طَابَعْ لَعْمَالة ارْجَالْ ابْمِيعَادْ شَيّاخَة حُضْرا
……….وْعُقبْ اللَّيلْ اتْبَاتْ تَمْدَحْ جَلْجَالة أزْرَابَة وَافْرَاشْ وَالرَقْمَة حُرا
……….وْزَخْرَافَة بَالْوَانْ تَعْطِي دَلاَلَة أشْكَالْ وْرُسُومْ تُرْمُزْ للصَحْرَا
……….تَحْكِي عَنْ اسْنِينْ فَاتَتْ طَـوّالَة اسْنَيّاتْ امْزَوْقَة تَجْلَبْ نَظْرَا
……….وَالْقَهْوَة والتّايْ منْهَا سَيّالَة الشَكْوَة بَرْبَاطْ فُوقْ الْحَمّارَا
……….بَالْعَفْصْ وْ عَرْعَارْ ريحَة فَعّالَة فَوّاحَة ابْجَرْتِيلْ وَ الدَبْقَة عَطْرا
……….اشْرُبْ يَا مَعْلُولْ لَبنْ الْمَوّالَة سَلكْ امْرَارَة فِيهْ للسَاقَمْ يَبْرَا
……….مْنَ النَعْجَة فَالْبَرْ تَرْعَى جَوّالَة وَاقْدَاحَاتْ الْبَانْ تَحْضَرْ فَالْمَرَا
……….غَرسْ وْ دَقْلَةْ نُورْ لَينَا بَجّالَة المْلّة فَالْكَانُونْ طَابَتْ بَالجَمْرَا
……….حَرْشَايَة وَاحْلِيبْ لَيهَا وَكّالَة جَبنْ ابْقَفْصْ ابْيَاضْ نعْتُو جُمّارَا
……….طَبِيعِي فُرْمَاجْ مَنْ صُنعْ الْخَالَة وَالْقَرْبَة بَامْيَاهْ سَالَتْ شَرْشَارَا
……….بَنّتْ مَسكْ اتْزِيدْ تَعْطِي مَثْقَالَة جَلْبَتْلِي لَنْظَارْ رَكْبِيَا شَقْرا
……….وَرْيَاهَة للْخَيرْ دِيمَة صَهّالَة الرَقْبَة بَسْبِيبْ بيها نَعّارَا
……….مَسْرُوجَة للْقَومْ عَنْهَا عَوّالَة مَنْ لحْيَالْ الْهِيهْ تَلْقَى جَرْجَارَا
……….ابْنَقْرَاتْ الْخَلْخَالْ تَقْضِي جَيَالَة الضَيفْ الْكَرِيمْ ليهَا بَبْشَارَا
……….بَالرَفْسَة وَادْهَانْ مَاهِي طَوّالَة كَرّامَة للضَّيفْ ذِيكْ الْمَسْرَارَا
……….اطْعَامْ الْكُسْكُسْ ليهْ دِيمَة فَتّالَة صِفَتْهَا غَزَالْ تَسْلَبْ بَالنَظْرَا
……….مَا يَامَنْ صِيّادْ جَاوهْ خَتّالَة الْعَينِينْ السُودْ خُمْرِيَة سَمْرَا
……….وَاحْوَاجَبْ عَالْعينْ دَارُو هَلاّلَة فُوقْ اكْتَافْ اشْعُورْ رَابَتْ مَظْفُورَا
……….كَمّوسَة بَالطِّيبْ للنّيفْ اقْبَالَة الْبَاسْ الْحَشْمَة زَادْ فَالْهمّة كُبْرَا
……….,وْ بَالشَعرْ الملْحُونْ عَنْهَا قَوّالَة امْلاَحَفْ الْوَانْ بَانُو سَحّارَا
……….واحْزَامْ البَثْرُورْ سَلْكُو يَتْلاَلَة تَكْلِيلَة وْ مَسْلُوتْ في وَذنْ الْبَتْرا
……….خُرصْ القَصّة وَ الْعِوَاشَقْ شَعّالَة الشّدْ وَالشَنْبِيرْ وَالْقَشْطَة صُرَا
……….والْخُمْري مَنْسُوجْ بالدّقْ أُخْلاَلَة الْمَدْوَرْ لمّاعْ وَ الْحَولي سُتْرا
……….وامْشبّكْ وَسْـوَارْ فَضّة وْ خَلاّلَة أجْحَافْ اعْلى الْبَلْ فَاتَتْ سَيّارَا
……….وْمرْحُولْ الْخَودَاتْ فيهُمْ سَوّالَة الْجَحْفَة مَوْجَاتْ مَاحَتْ بَالْعَطْرَا
……….اتبّـعْ في خَطْوَاتْ لحْجَلْ عَدّالَة وَارْجَالْ الْبَارُودْ بالْبَاسْ الْفُخْرَا
……….غَي فُرْسَانْ اطْيُورْ حَامُو مَيّالَة مَنْ رَاسْ الْمَشْوَارْ دَارُو غَبّارَا
……….اهْرُبْ يَا عَلاّلْ جَاوْ الْخَيّالَة الْعَرْبي وَ الْقَابْسِي مَاهُمْ عُرَا
……….دُخّانْ اكْحَلْ غَيمْ دَايَرْ ظُلاّلَة ازْغاريتْ الْحَانْ للضّايمْ يَبْرَا
………تَمْسَحْ كُلْ اقْلُوبْ وَاتْنَحْ ازْلاَلَة احْني وْضَايَاتْ غَابَة بَالسَدْرَا
……….وَاشْعَابْ وْ خُلْجَانْ وَدْيَانُو حَالَة البُطْمَة بَاظْلاَلْ بَانَتْ شَوَارَا
……….مَقْصَدْنَا فَالْحَرْ فِيهَا قَيَّالَة اللّكْ وْ زَبُّوجْ فَالْوَادْ أُعْمَارَا
……….وَ الزّاوَشْ وَزْوَازْ دَايَرْ حَلْحَالَة أُعْقُبّة وَ اطْيُورْ سَكْنُو وَكّارَا
……….عَنْ لَرْنَبْ وَ احْبَارْ عَاشُو مَدْلاَلَة وْلاَتَامَنْ حَجْلاَتْ طَارُو صَفّارَا
……….والثَبَّتْ فَالسَيرْ وَ أقْرَا الْبَسْمَالَة الثَعْلَبْ وَالذِيبْ طَبعْ الْمَكّارَا
……….صَيّادَة فَالْبَرْ يمْشُو دَهْكَالَة الْقَوبَعْ وَ التَرشْ مَنّكْ فَرْفَارَا
……….وْ مُسَيْسِي وَالدُخْ طَارُو مَذْلاَلَة اصْرنْدِي وَ الصَوّاقْ مَاهُمشْ احْيَارَا
……….واللَّهَايَاتْ أُرْكَاكْ لُحتْ الدَرْبَالَة والْجَرْبُوعْ أمْعَا الجرْدَة في زَغْرَا
……….مِيرَاقَة وَاعْفَارْ دَارُو شَغْلاَلَة والقنْفُودْ امْعَا الزِوَاقَدْ في سَهْرَا
……….وَالْوَرْنَة وَالضّبْ ديمة صَوّالَة امْعَاذَرْ وَامْرُوجْ شَعّاعَـة خَضْرَا
……….مخْرُوفَة وَ ارْبِيعْ جَادَتْ غَسّالَة الْخَدّة وَالرُقّيمْ تَفْلى دَرْدَارَا
……….حُمّيضْ وْ خُبيزْ للْمَة كَمّالَة مَرِّيوتْ وَ الْخَافُورْ وَ الْفَيجَلْ تَارَا
……….تَالْمَة وَالتَرْثُوثْ مَانَا قَدّالَة الْعَجْرَمْ وَ اقْدَادْ وَارْمَاثْ وْ شَجْرَا
……….كُمّيشْ وْ لَوّايْ خَبّلْ تخْبَالَة وَالْقِيزْ ابْعَسْـلُوجْ دَارْ النُوَارَا
……….خَيّاطَة وَ اشْنَافْ نَجمْ وْ خُرْطَالَة الْحَلْفَة بَالدَقْمُوسْ دَارَتْ جُمّارَا
……….وَالْبَاقَلْ بَاكْدَاهْ خُوذْ الْحَمّالَة الْجَوْبَرْ وَالتَرْفَاسْ مَطْيَبْهَا صُفْرَا
……….سُبْحَانْ الله خَالْقُو ذُو الْجَلاَلَة اللِّي قَالْ الأبْيَاتْ جَاتُو ذَالفَكْرَا
……….مَنْ صُغْرُو شَفّايْ عَرْشُـو رَحّالَة يَنْضَحْ بَاللِّي فِيهْ بَاشْعَارُو يَقْرَا
……….متْفَكّرْ لَرْصَامْ مَنهُمْ في حَالَة عَايَشْ في خَيَالْ مَطْيَبْهَا عَشْرَا
……….وْ مَتْفَكّرْ مِيعَادْ ذُوكْ الرَجّالَة ابْقَاوْ اعْلى خَيرْ رَاجَعْ للدَشْرَا
……….الْبَاطِيمَة عَلاّتْ دَارَتْ خِيّالَة ادْرُوجْ وْ كَرْلاَجْ تَطْلَعْ دَوَّارَا
……….وْ فَالثَاني إيطَاجْ بَانَتْ طَلاّلَة اثْمَنْيَا وَاتْلاثينْ رَقْمِي يَا حُضْرَا
……….وْ مَكْتُوبَة في الْبَابْ لَيكُمْ دَلاّلَة مَرْحَبَا بَضْيُوفْ ليّا زِيّارَا
……….وَحِيدْ وْ لَولاَدْ بِيكُمْ وَهّالَة